Aprende estatístika durante dekada ida

Dra. Bernadetha fó treinamentu ba staff peskiza MAP kona-ba analiza estatístika.

Seeds of Life foin kompleta treinamentu estatístika liu dekada ida ba staff peskiza MAP nian. Staff peskiza liu husi na’in 30 husi parte hotu-hotu iha teritóriu laran hetan ona treinamentu hodi analiza no aprezenta sira-nia dadus peskiza rasik. Liu husi tinan 10 nia laran, Dra. Bernadetha Mitakda halo viajen husi Universidade Brawijaya Malang hodi hanorin staff peskiza sira. Nia ho kontente wainhira observa katak “peskizadór hotu-hotu hadi’a ona sira-nia koñesementu kona-ba estatístika. Sira iha komprensaun di’ak kona-ba sira-nia dadus no instrumentu estatístika oioin no mos interpretasaun di’ak ba rezultadu husi analiza.” Koñesementu no talentu hirak ne’e importante tebes ba sira hodi hala’o atividade peskiza ne’ebé rezulta variedade foun barak mak identifika no lansa ona hodi uza husi agrikultór Timorense. To’o agora, iha variedade oin 11 husi 12 ne’ebé lansa husi MAP hanesan rezultadu husi serbisu staff peskiza sira-nian. Iha variedade oin 7 mak foin daudaun ne’e propoin ona ba lansamentu enkuantu iha 5 tan mak tama ona ba faze avaliasaun final. Seeds of Life hakarak agradese ba Dra. Bernadetha ne’ebé ho entuziazmu no la sente kole hodi hanorin ho kualidade di’ak durante tinan barak nia laran.

Leave a Reply

You must be logged in to post a comment.