Koko Sabór Ai-farina iha Aileu

Iha Sesta dia 15 de Novembru liu ba, hamutuk agrikultór liu husi nain 50, estensionista, peskizadór ho membru komunidade ba hamutuk iha Estasaun Peskiza Quinta Portugal, Aileu hodi koko sabór ai-farina MAP-SoL nian ne’ebé kuda iha ne’ebá.

“depois de peskiza ne’ebé halo ba ai-farina durante tinan tolu nia laran ami konsege deskobre varidade ne’ebé hatudu nia adaptasaun makaas ba iha rai no iha rezisténsia ba kondisaun tempu iha Timor-Leste”

cassava_tasting_aileu-40cassava_tasting_aileu-39Iha eventu ida ne’e partisipante sira koko sabór husi ai-farina matak lokál no varidade foun hamutuk varidade oin 15 no koko mos sabór husi ai-farina tasak varidade oin 10 hodi determina varidade ida ne’ebé mak diak liu. Sabór ne’ebé koko mak hanesan kona-ba ai-farina nia midar, moruk, testura no nia konsisténsia.

Varidade hirak ne’e kuda iha estasaun peskiza kuaze tinan tolu nia laran ona, no koko sabór ne’ebé halo iha semana kotuk ne’e hanesan koko sabór ne’ebé halo ba dalatolu ona para hodi garante katak nia sabór konsistente no fó diak ba komunidade suco nia gostu durante hanaruk periódu peskiza.

Varidade oin 13 mai husi África, ho varidade lokál oin rua mak kahur malu, no kuda iha epoka hirak nia laran hodi analiza nia adaptasaun ba rai no mos ba kondisaun tempu iha Timor-Leste.

Depois de testu ne’ebé halo iha semana kotuk ba, tuir fali halo testu sabór sientífiku uja mákina hodi determina nível sianida hidrojénio, ne’ebé sai hanesan determinante prinsipál ba sabór.

Cipriano Martins, peskizadór ne’ebé bazeadu iha Estasaun Peskiza Quinta Portugal, esplika kona-ba elementu tolu husi prosesu peskiza mak hanesan: kuda no analiza nia adaptasaun ba iha rai; partisipante no koko HCN no koko nia durasaun moris husi kuda to’o koileta.

Nia haktuir katak, “depois de peskiza ne’ebé halo ba ai-farina durante tinan tolu nia laran ami konsege deskobre varidade ne’ebé hatudu nia adaptasaun makaas ba iha rai no iha rezisténsia ba kondisaun tempu iha Timor-Leste. Varidade ida ne’e konsistentemente hatudu rezultadu produsaun ne’ebé aas. Ami sei rekomenda ba MAP atu ofisialmente halo lansamentu ba varidade ida ne’e”.

 

Leave a Reply

You must be logged in to post a comment.