Kuaze balun husi agrikultores produsaun alimentar iha Timor-Leste kuda variedades di’ak

Kuaze balun husi agrikultores produsaun alimentar iha Timor-Leste kuda variedades di’ak

Simao (Enumerador) intervista hela Agrikultor ida iha nia toos

Simao (Enumerador) intervista hela Agrikultor ida iha nia toos

Agrikultór kuaze nain ida husi rua mak kuda produsaun alimentar iha Timor-Leste uza variedade kualidade di’ak oin ida ka liu. Levantamentu ne’ebé halo ba umakain agrikultór 700 iha inísiu tinan ida ne’e husi programa Fini ba Moris (Seeds of Life) iha suku 60 selesionadu ho arbiru/random iha munisípiu 13 hatudu katak 48% husi agrikultór ne’ebé hetan entrevista kuaze kuda ona variedade kualidade di’ak oin ida ka liu husi ai-horis batar, háre, forerai, ai-farina no/ka fehuk midar. Ida ne’e hatudu aumentu iha adosaun ba variedade kualidade di’ak kompara ho tinan lima liu ba, ne’ebé nia avalia adosaun 18%.

 

Iha tinan 2007, Ministériu da Agrikultura e Peskas (MAP) lansa fini produsaun alimentar ho variedade kualidade di’ak oin hitu mak hanesan: batar variedade oin rua, háre variedade oin ida, forerai variedade oin ida no fehuk midar variedade oin tolu. Variedade hirak ne’e – ne’ebé produs entre 25-150% liu variedade lokál baibain sem mudansa adisionál ruma iha oinsa ai-horis ne’e moris – koko ona husi programa Fini ba Moris durante tinan hirak nia laran, iha estasaun peskiza no iha agrikultór sira-nia to’os atus ba atus iha teritóriu laran tomak. Dezde 2007, MAP, programa Fini ba Moris no organizasaun barak husi nasionál no internasionál distribui ona fini kualidade di’ak ba agrikultór Timor oan sira. Iha mos grupu habarak fini komunidade liu husi rihun ida ne’ebé kuda fini ba nia membru sira no viziñu, no to’o iha tinan klaran 2016 iha Produtór Fini Komersiál 69 mak rejistradu iha MAP. Númeru variedade ne’ebé lansa foin daudaun aumenta husi hitu ba sanulu resin sia, inklui variedade koto oin rua no foremunggu oin rua.

 

Levantamentu foin daudaun deskobre katak avalia adosaun aas liu ba variedade kualidade di’ak mak batar; 44% husi agrikultór hotu-hotu kuda batar entre variedade Sele, Noi Mutin ka Nai, ka kombinasaun entre hirak ne’e. Avalia adosaun ba háre mak 21%; fehuk midar 10%; forerai 6% no ai-farina 5%. Kuaze agrikultór hotu-hotu ne’ebé kuda variedade kualidade di’ak sira planu atu kontinua kuda.

 

Umakain ne’ebé kuda variedade kualidade di’ak  sira iha esperiénsia ladún hamlaha kompara ho umakain sira ne’ebé la kuda; 54% husi umakain kuda variedade kualidade di’ak haktuir katak sira iha esperiénsia hasoru hamlaha entre fulan Fevereiru 2015 no Janeiru 2016 kompara ho 69% husi umakain ne’ebé la kuda variedade kualidade di’ak. Adotante tempu naruk bele mos hetan osan liu tan husi fa’an ai-horis hirak ne’e kompara ho sira ne’ebé la kuda.

 

Iha tinan kotuk, programa Fini ba Moris hala’o mos estudu avaliasaun impaktu liu husi: kolaborasaun ho ajénsia sira seluk; jéneru; ambientál; hasa’e kapasidade; no análize finansiál no ekonómiku husi programa Fini ba Moris.

 

Informasaun detallu liu tan kona-ba levantamentu ikus ba programa Fini ba Moris no estudu avaliasaun impaktu oioin bele haree iha http://www.seedsoflifetimor.org/research/reports-and-studies.

Leave a Reply

You must be logged in to post a comment.