Serimónia Entrega Patrimóniu MAP-SoL 

Programa Seeds of Life (SoL) hanesan programa ida iha Ministériu da Agrikultura i Peskas (MAP) nia laran ne’ebé hetan suporta husi governu Australia dezde tinan 2000. Ministériu da Agrikultura i Peskas (MAP) ho Seeds of Life (SoL) serbisu hamutuk ona durante tinan 15 resin hodi mellora seguransa ai-han iha Timor Leste. Programa ida ne’e foka ba dezenvolve kapasidade ofisiál MAP no grupu agrikultór sira iha teritóriu laran tomak hodi bele avalia, produs no distribui fini ai-han ho kualidade aas husi variedade ai-horis sira ne’ebé fó produsaun aas liu ne’ebé baibain agrikultór sira kultiva iha Timor-Leste hanesan batar, hare, forerai, fehuk midar no ai-farina. SoL agora daudaun tama ona ba nia faze final no sei termina iha fin de Juñu 2016.

Patrimoniu husi SoL ne’ebe entrega ba MAP

Faze 1 husi programa SoL (tinan 2000-2005) involve importasaun no halo selesaun ba variedade produsaun aas iha estasaun peskiza sira, no Faze 2 (tinan 2005-2010) halo espansaun ba selesaun variedade no realiza teste balun iha agrikultór sira-nia to’os nune’e mos habarak fonte fini MAP hodi bele halo distribuisaun luan liu tan. Faze 3 estabelese Sistema Fini Nasionál no sistema fini munisipál balun ne’ebé regularmente planéia, produs no distribui fini sufisiente atu nune’e maizumenus 50% husi familia agrikultór 130,000 iha teritóriu laran tomak bele hetan asesu ba fini kualidade di’ak iha tempu kuda.

Liu husi programa SoL-MAP kria mos Konsellu Fini Nasionál ne’ebé involve MAP ho nia parseiru dezenvolvimentu sira ne’ebé kompostu husi reprezentante MAP, Produtór Fini, Agrikultór, ONG, Universidade, Empreza no Relijioza hodi jere Sistema Fini Nasionál atu nune’e Timor-Leste labele depende nafatin ba fini importa husi rai liur no independente iha nia seguransa fini no soberania fini.

Durante faze tolu nia laran ne’ebé kada faze ho durasaun tinan 5 Seeds of Life kompra sasan/patrimóniu barak hodi fó apoiu ba implementasaun atividade programa. Tanba programa ida ne’e sei remata iha fin de Juñu 2016 maka sasan ka patrimóniu hirak ne’ebé iha sei entrega hotu ba MAP atu nune’e bele uja hodi mantein operasaun Sistema Fini Nasionál no Sistema Fini Munisipál neebe durante ne’e estabelese tiha ona.

Patrimóniu SoL nian sei entrega husi Embaixadór Australia, S.E. Peter Doyle, ba Ministru MAP, S.E. Estanislau da Silva, iha Serimónia Entrega ofisiál ne’ebé realiza iha kampaun MAP, Comoro iha óras tuku 10:00 dader Sesta feira ida ne’e.

 

 

 

 

 

Leave a Reply

You must be logged in to post a comment.