Fó avizu ba agrikultór sira atu kuidadu tanba dalaruma tempu udan mai tarde

Tanba haree ba kondisaun El Niño, Ministério da Agricultura e Pescas (MAP) fó avizu ona ba agrikultór sira atu labele kuda lai hein to’o tempu udan hahu loloos.

Avizu ofisiál fó sai ona liu husi Director Geral da Agricultura e Pekuária MAP, Sr. Januario Marçal, no distribui ona ba Serviços da Agricultura Distrital ho Radio no Televizaun Timor-Leste (RTTL) iha semana kotuk ba.

“Tanba prekupasaun ba posibilidade dezenvolvimentu fraku husi El Niño, maka ami fó avizu ba agrikultór sira hotu atu labele kuda lai ai-horis to’o sira fiar katak tempu udan hahu loloos ona.”

Husu mos ba agrikultór sira atu rai hela fini rezerva balun atu nune’e bele prevene karik ida ne’ebé kuda primeiru hetan failansu/la moris tanba kauza husi udan been la sufisiente depois de kuda liu tiha atu nune’e sira bele kuda fila-fali.

Due to a possible late start to the 2014 rainy season, farmers are advised to be cautious with their crop planting © Alexia Skok/Seeds of Life

Tempu udan hahu tarde iha fatin balun dalaruma tanba relasionadu ho kondisaun atuál besik –El Niño. Durante El Niño, tempu udan bele mai tarde no udan been bele menus husi fulan Marsu to’o Jullu iha tinan oin mai.

Mezmu El Niño seidauk hahu, Departementu Agro-Meteorolojia (ALGIS) iha Ministério no MAP-SoL kontinua observa besik liu tan ba situasaun ne’ebé iha.

Tabela iha kraik destaka/menyoroti kona-ba oinsa tempu udan hahu hetan mudansa tanba kauza husi El Niño ho La Niña. Ida ne’e hatudu dadus médiu ne’ebé distritu idaidak akumula udan been 100mm iha fulan ida nia laran ne’ebé hatudu inísiu tempu udan (rata rata), ho fonte dadus husi distritu idaidak nia sentru.

Fatin	La Niña	Médiu	El Niño
Manatuto	Sedu liu loron 34	23 de Janeiru	La atinji
Dili	Sedu liu loron 23	16 de Dezembru	Tarde loron 5
Oecusse	Sedu liu loron 24	11 de Dezembru	Tarde loron 20
Liquiça	Sedu liu loron 16	8 de Dezembru	Tarde loron 7
Maliana	Sedu liu loron 7	7 de Novembru	Tarde loron 29
Baucau	Sedu liu loron 20	7 de Dezembru	Tarde loron 13
Los Palos	Sedu liu loron 19	2 de Dezembru	Tarde loron 8
Gleno	Sedu liu loron 13	10 de Novembru	Tarde loron 22
Aileu	Sedu liu loron 16	1 de Novembru	Tarde loron 11
Ainaro	Sedu liu loron 24	2 de Novembru	Tarde loron 18
Same	Sedu liu loron 51	8 de Novembru	Tarde loron 24
Suai	Sedu liu loron 19	27 de Novembru	Tarde loron 17
Viqueque	Sedu liu loron 22	8 de Dezembru	Tarde loron 6

ALGIS ho MAP-SoL sei kontinua atu monitoriza situasaun iha Oceano Pasífiku/Samudra Pasifik, atu determina impaktu ne’ebé dalaruma bele mosu ba klimátiku iha Timor-Leste.