Kompetisaun sabór iha Betano
Agrikultor husi Betano koko hela Hohrae 3 iha Koko Sabar iha Sentru peskiza Betano
“Koko sabór hanesan buat ne’ebé importante tanba agrikultór sira gosta atu kuda, han no fa’an ai-horis ne’ebé nia sabór diak no iha produsaun aas,” tenik Felisberto Amaral Soares, Peskizadór ida husi MAP-SoL.
Nia haktuir ida ne’e iha eventu loron rua koko sabór iha Sentru Peskiza Betano semana kotuk ba hodi halo komparasaun fehuk midar varidade oin ualu ho duhaen.
Partisipante sira ne’ebé partisipa iha eventu koko sabór ida ne’e mak agrikultór sira ne’ebé hela besik Sentru Peskiza Betano, estudante husi Universidade Timor-Leste ne’ebé halo estájiu, no staff husi MAP-SoL.
Ba fehuk midar, rezultadu hatudu katak partisipante sira gosta liu mak sabór husi Hohrae 1 no Local Mutin, tuir fali mak varidade CIP 71 ho CIP 77.
Tuir Felisberto, durante tinan ualu nia laran peskiza ne’ebé halo husi MAP-SoL ba fehuk midar ne’ebé rezulta lansamentu varidade (Hohrae 1, 2 ho 3) kuaze hatudu rezultadu produsaun ne’ebé konsistentemente aas.
Ba koileta iha epoka tinan ida ne’e, Hohrae 1 produs tonelada 13.93/hektár iha Sentru Peskiza Betano.
“durante tinan ualu nia laran peskiza ne’ebé halo husi MAP-SoL ba fehuk midar ne’ebé rezulta lansamentu varidade (Hohrae 1, 2 ho 3) kuaze hatudu rezultadu produsaun ne’ebé konsistentemente aas”
Ba testu sabór duhaen, iha ne’e hatudu katak duhaen lokál husi Lospalos nia sabór kuaze diak liu no tuir fali mak varidade duhaen husi Papua Nova Guiné ho Tailándia.
Ida ne’e hanesan eventu primeira vez koko sabór duhaen ne’ebé realiza iha Betano depois de koko sabór duhaen SoL nian ne’ebé primeiru halo iha Loes fulan Setembru 2013.
Lokal duhaen husi Lospalos
Peskizadór MAP-SoL Marcos Corréia Vidal haktuir katak Seeds of Life planéia atu halo peskiza ba duhaen iha fatin oioin iha Timor-Leste laran tomak.
“Depois de Betano, ami sei kuda duhaen iha distritu Baucau ho Aileu hodi haree oinsa ai-horis ida ne’e adapta ho fatin, elevasaun, klíma no kondisaun oioin.
“Duhaen iha nutrisaun ne’ebé diak ba agrikultór sira, no mos bele hadi’a rai nia bokur, hamenus du’ut ne’ebé moris, no aumenta nível nitrojéniu iha rai laran,” tenik nia.
