Lino Agrikultór Ativu husi Lospalos

Lino Rui de Andrade (idade tinan 36) hanesan agrikultór kuda batar ne’ebé hela hamutuk ho nia kaben, Atina, no oan nain tolu iha aldeia Nakroma, suco Fuiloro, sub-distritu Lospalos, distritu Lautem.

Lino hanesan agrikultór susesu ne’ebé implementa prátika agrikultura di’ak dezenvolve husi Ministério da Agricultura e Pescas (MAP) ho Seeds of Life (SoL). Nia involve iha habarak fini komersiál iha tinan 2013, ne’ebé hahu kuda fini dezde tinan 2011.

“Sele di’ak tebes tanba hatudu produsaun kapaas; nia musan ho fulin bo’ot”

Lino uja silo hodi haloot nia ai-han, kuda variedade MAP-SoL nia hanesan Sele, Noi Mutin ho Utamua, monitoriza estasaun metereolojia MAP-SoL nian, hadi’a nia lutu no kuda kahur lehe ne’ebé habokur rai no prevene du’ut. Inisiativa hirak ne’e hanesan rezultadu husi aproximasaun MAP-SoL nian hodi ajuda buat barak ba komunidade agrikultór kona-ba prátika agrikultura di’ak.

Lino hahu kuda batar variedade Sele, variedade ne’ebé lansa husi MAP-SoL iha nia to’os ho luan hektár 1.4 depois de simu fini 25kg husi estensionista MAP-SoL. Nia kontente tebes ho produsaun ai-horis ne’ebé nia hetan; “Sele di’ak tebes tanba hatudu produsaun kapaas; nia musan ho fulin bo’ot. Iha koileta Sele primeiru, hau konsege hetan liu husi tonelada ida. Hau fa’an ba ONG sira no hetan to’o agora $2,100. Balun hau fa’an ba viziñu sira, nune’e mos rai balun ba han iha uma laran”.

Total osan $ 2,100 ne’e Lino hetan husi fa’an batar fini, batar uja ba han, batar fai no batar uut durante epoka hirak nia laran ba ONG sira, merkadu lokál no konsumidór sira iha Dili. Osan ne’ebé nia hetan husi fa’an produtu batar hirak ne’e uja ba sosa nesesidade uma laran no instrumentu seluk ne’ebé ajuda nia serbisu hanesan agrikultór, inklui silo rua ne’ebé uja ba haloot fini to’o tonelada 1.7 kada silo, nune’e mos mákina dulas batar nian.“Hau sosa silo ne’e atu haloot batar Sele. Silo ne’e iha nia boraisa ka kamardiál hodi aperta nia matan halo metin no atu garante Sele mos nafatin, nabilan, no lívre husi fuhuk ka insekta sira seluk”.

Hanesan mos ho empreza sira, Lino fó aluga nia mákina dulas batar hanesan méius ida hodi hetan rendimentu barak liu tan; “Wainhira hau la uja mákina dulas batar ne’e, hau fó aluga ba hau nia viziñu sira atu nune’e sira bele uja hodi dulas sira-nia batar. Sira selu hau $1 ba kada luhu ka bote ida ne’ebé dulas tiha ona. Ida ne’e hanesan dalan seluk ba hau atu bele hetan osan”.