GKHF tolu fahe fini ba familia vulnerável iha Liquiça

Grupu Komunidade Habarak Fini (GKHF) tolu iha Liquiça primeira vez produs fini ne’ebé resin/surplus husi varidade batar kualidade diak Noi Mutin hodi fahe ba familia vulnerável iha sira-nia distritu laran.

Rezultadu ne’e hetan husi koileta iha epoka segundu dezde sira forma grupu iha tinan 2012, grupu oin tolu ne’e mak hanesan – Moris Foun, St. Antonio, no Balibau – ne’ebé konsege fahe fini iha masa agua liu husi 150 (kada masa 1.3kg) husi fini batar Noi Mutin ba umakain liu husi 80 iha suco Guico, sub-distritu Loes.

IMG_5869

Grupu ‘Moris Foun’ fahe 40 masa fini Noi Mutin ba uma kain vulnerabel ba uma kain iha suco Guico, distritu Liquica

Chefe husi grupu St. Antonio, Sr. Egas dos Santos, haktuir katak sira halo koileta ona ba batar ho kuantidade bidon (200 ltr) rua iha epoka ikus.

“Bidon ida ami rai ba fini no ida seluk ami fahe ba membru grupu, no mos ba agrikultór sira seluk iha aldeia Irlelo, Fatufei, Mau-unu, Pandevou no Caicasavou.

“Ami hetan rezultadu produsaun ne’ebé diak tanba ne’e ami hakarak sira seluk mos bele hetan rezultadu ne’ebé hanesan, tanba varidade ida ne’e diak los.”

Amelia de Jesus, membru husi grupu Bilbau, konkorda. “Ami hakarak fahe fini ida ne’e ba sira seluk ne’ebé seidauk hetan.”

Estensionista Bartolomeu da Silva, haktuir katak autoridade lokál sira ajuda hodi identifika umakain vulnerável 30 iha kada aldeia.

“Grupu hirak ne’e iha ona fini ne’ebé sufisiente para atu kuda fila-fali iha epoka oin mai no balun mak konsege fahe entre membru grupu, nune’e sira hakarak fahe rezultadu produsaun ne’ebé resin ba agrikultór sira seluk iha sira-nia suco laran.”

“Ida ne’e diak tanba agora GKHF sira gosta ho banku fini no sirkula ona fini iha sira-nia suco laran. Agrikultór sira la presiza atu depende tan ba fini mai husi rai liur. Sira bele hetan iha ne’e.”

“Ida ne’e diak tanba agora GKHF sira gosta ho banku fini no sirkula ona fini iha sira-nia suco laran.

“Agrikultór sira la presiza atu depende tan ba fini mai husi rai liur. Sira bele hetan iha ne’e.”

Enkoraja komunidade sira atu fahe fini sai hanesan foka prinsipál husi ekipa Habarak Fini Komunidade MAP-SoL nian.

Ekipa ne’e serbisu hamutuk ho GKHF sira hodi ajuda sira produs fini husi varidade kualidade diak ne’ebé naton para bele fahe entre membru grupu, nune’e mos bele fa’an rezultadu ne’ebé resin/surplus hodi hetan rendimentu.

IMG_5915

Zulmira Maia and Lucinda Ribeiro ho kontente tutur batar fini

“Wainhira agrikultór sira seluk ne’ebé hela dok hakarak atu hetan fini, sira la presiza atu ba merkadu ou tún ba villa, sira bele hetan deit husi GKHF iha sira-nia suco laran,” tenik Koordenadór GKHF Rui Pereira.

“Ami mos hakarak atu enkoraja agrikultór sira hodi fahe informasaun entre sira rasik kona-ba disponibilidade fini iha sira-nia suco laran.”

GKHF fahe fini ne’ebé resin/surplus ba umakain vulnerável sira iha sira-nia komunidade laran iha distritu 11 nia laran (ex. la inklui Manufahi ho Dili) no fini kain husi varidade fehuk midar no ai-farina kualidade diak sei distribui ba agrikultór sira iha suco hotu-hotu iha teritóriu laran tomak hahu husi fulan Janeiru bazéia ba lista estensionista sira nian kona-ba sira ne’ebé mak presiza liu.

MAP-SoL sei enkoraja nafatin atu fahe fini komunidade hodi ajuda hasa’e siguransa fini iha teritóriu laran.

Leave a Reply

You must be logged in to post a comment.