Grupu Habarak Fini Komunidade Atauro Manan Prémiu Nutrisaun Prezidente Nian
Alice Ximenes, chefe grupu Gender Hun Besik simu serfikadu Premiu Nutrizaun husi Presidente no Permeira Dama © PNPTL
Gender Unidade Hun Besik, Grupu Habarak Fini Komunidade (GHFK) ida husi Suco Beloi, Atauro, Munisípiu Dili, hetan avaliasaun hanesan grupu lima neebe di’ak liu neebe manan Prémiu Prezidente ba Nutrisaun Familia Saudável.
Prémiu ida ne’e atu rekoñese no elojia líder feto ou grupu feto neebe hatudu inovasaun exelente, komitmentu, no lideransa atu promove no hadi’a nutrisaun iha familia no komunidade nia le’et.
“Wainhira ami hala’o ami nia atividade agrikultura ami la dúvida kona-ba ai-han no ami nia familia, tanba ami kuda ai-han. No baibain modo mai husi Dili, maibe agora ai-han mos besik iha komunidade nia le’et.”
“Ami kontente tebes tanba ami nia grupu bele kontribui ba hadi’a nutrisaun iha ami nia familia no mos iha komunidade nia le’et,” tenik líder grupu Alice Ximenes Soares.
“Wainhira ami hala’o ami nia atividade agrikultura ami la dúvida kona-ba ai-han no ami nia familia, tanba ami kuda ai-han. No baibain modo mai husi Dili, maibe agora ai-han mos besik iha komunidade nia le’et.”
Prezidente Timor-Leste, H.E Taur Matan Ruak, kondekora grupu ne’e ho sertifikadu no osan ho montante $ 1,200 iha serimónia Loron Restaurasaun Timor Leste Nian ba dala 13 iha Munisípiu Bobonaro. Entre grupu hirak ne’e di’ak liu mak grupu Klibur Feto Maluk husi munisípiu Manufahi neebe manan osan ho montante $ 10,000.
Alice Ximenes Soares (karuk) hamutuk ho grupu 3 seluk mos simu osan $1,200 hodi suporta sira nia atividade hodi promove nutrisaun © PNPTL
“Osan ne’e sei uja ba apoia atividade grupu hanesan material bee nian hodi rega fehuk midar no modo neebe ami kuda, e ami mos hakarak atu sosa fini modo nian,” salienta husi Alice.
Grupu Gender Unidade Hun Besik kompostu husi membru nain 15 (feto nain 11 no mane nain 4) no promove nutrisaun di’ak liu husi estabelesimentu sentru produsaun fehuk no ai-farina kain neebe hetan suporta husi Ministério da Agricultura e Pescas (MAP) ho Seeds of Life.
Sira kuda ai-farina variedade kualidade di’ak (Ai-luka 2 ho Ai-Luka 4) neebe fornese kalóriu husi uut neebe barak no variedade fehuk midar kualidade di’ak hanesan (Hohrae 1, 2 ho 3) neebe riku karboidratu. Fehuk midar variedade Hohrae 3 kór laranja mos aas iha beta-carotene (fornese vitamina A).
Alice hamutuk ho nia membru ida hamost du’ut iha sira nia sentru produsaun fehuk midar kain © Yessy Betty/Seeds of Life
Dezde estabelese iha fulan Agostu 2014 sentru produsaun fehuk kain grupu nian konsege distribui ona maizumenus fehuk kain 44,200 husi variedade Hohrae 1, 2, no 3 ba umakain 101 iha Atauro neebe sira konsege hetan osan liu husi $ 400 (sentavus 1/kain).
“Ami gosta los ho variedade Hohrae tanba moris lais, isin bo’ot no sabór di’ak.” Tenik Alice.
“Ami fa’an deit mak fehuk midar nia kain husi ami nia sentru produsaun ba komunidade sira iha Atauro para bele kuda. Nia tahan nurak no nia isin ami uja ba konsumu iha uma laran maibe ami mos hahu ona fa’an ba komunidade sira”.
Alice ho membru balun iha sira nia sentru produsaun ai-farina ne’ebe la kleur tan atu koleita © Yessy Betty/Seeds of Life
Sentru produsaun ai-farina kain ho luan hektár 0.5 estabelese iha fulan Dezembru 2014 no sei halo koileta iha tempu badak atu nune’e bele distribui ba familia agrikultór sira iha Atauro.
Aleinde sentru habarak fehuk no ai-farina kain, grupu ne’e mos estabelese kolam ba ikan nila, hakiak animal no kuda no fa’an modo fresku oioin ba komunidade sira, otél no restorante sira iha Atauro.
“Prémiu ida ne’e motiva ami atu kontinua ami nia atividade grupu hodi promove nutrisaun di’ak. Ami sei habelar ami nia to’os neebe kuda ai-han nutrisaun para bele fornese ba ami nia familia no mos ba komunidade seluk iha Atauro laran”.
