Husi ai-farina ba fahi; Istória husi Filomeno da Cruz

“Hau kontente,” tenik Filomena da Cruz (tinan 55), agrikultór kuda ai-farina ne’ebé hela iha Camlor, suco Luca, Distritu Viqueque, “Hau kuda ai-farina foin fulan neen, maibe hau sente ona nia benefísiu, ”

Filomeno da Cruz involve iha habarak fini iha fulan Jullu tinan kotuk ba hanesan produtór kontratadu ba variedade ai-farina Ai-luka 2 ho Ai-luka ne’ebé lansa iha tinan 2009 husi Ministério da Agricultura e Pescas (MAP) no Seeds of Life (SoL).

Filomeno da Cruz hamriik iha nia ai-farina toos. © Yessy Betty / Seeds of Life

Hanesan produtór kontratadu, Filomeno simu fonte fini (kain) primeiru ne’ebé nia kuda iha nia to’os ho luan hektár 2 hodi bele produs kain ne’ebé ikus mai sei sosa husi MAP-SoL para bele halo distribuisaun ba agrikultór lokál sira seluk, grupu agrikultór no instituisaun ne’ebé rekere atu kuda iha epoka tuir fali.

“Di’ak tebes ba ami tanba MAP-SoL bele sosa nia kain, nune’e mos ami bele hetan benefísiu seluk husi uja nia tahan no isin. Maneira ida ne’e motiva ona ami atu kontinua kuda ai-farina”.

Filomeno nia oan feto fase hela ai-farina hodi han ba uma laran nian. © Yessy Betty / Seeds of Life

Tanba MAP-SoL sosa deit nia kain, maka Filomeno uja nia isin no tahan hodi konsumi iha uma laran nune’e mos fa’an balun iha merkadu, ne’ebé fó rendimentu ba nia familia uma laran.

“Tanba MAP-SoL sosa deit mak nia kain, hau iha rekursu ai-farina tahan no isin ne’ebé bele han iha uma laran ou fa’an balun”.

“Hau espera katak ho esperiénsia ne’ebé hau iha, bele positivumente fó impaktu ba hau nia viziñu sira atu nune’e sira mos bele hadi’a sira-nia moris. Hau bele haree katak hau nia viziñu balun hahu kuda ona ai-farina no agora hakiak mos fahi”.

Liu husi faan ai-farina, Filomeno bele ona hola fahi hodi hakiak no halo negosiu © Yessy Betty / Seeds of Life

Filomeno uja osan ne’ebé nia hetan husi fa’an ai-farina tahan no isin hodi sosa fahi rua, ne’ebé bele mos fó han ho ai-farina ne’ebé nia kuda.

“Hau sosa fahi rua; ida aman no ida inan. Hau fó han ho ai-farina tahan no isin ne’ebé labele fa’an ba ema iha merkadu.”

Husi fahi rua ne’ebé nia sosa iha inísiu, agora Filomeno nia fahi kuaze liu ona husi sanulu, ne’ebé nia planéia atu hakiak maizumenus 20 iha luhan laran.

“Aleinde hetan husi ai-farina, hau mos hetan osan husi fahi ne’ebé hau hakiak. Wainhira fahi sira ne’e boot, hau bele fa’an ho folin maizumenus $200 ba fahi ida depende ba nia isin”.

Husi rendimentu ne’ebé nia hetan husi ai-farina no hakiak fahi, Filomeno bele kompleta nia oan sira-nia nesesidade eskola nian, no bele kobre nesesidade loroloron uma laran nian.

“Hau iha oan nain ualu, balun kaben ona no balun sei eskola iha báziku no mos iha universidade”.

Aleinde ne’e, Filomeno mos fahe ai-farina kain no isin ba viziñu sira atu nune’e sira mos bele kuda varidade ai-farina ne’ebé lansa tiha ona, potensialmente aumenta rezultadu produsaun komunidade nian.

“Hau espera katak ho esperiénsia ne’ebé hau iha, bele positivumente fó impaktu ba hau nia viziñu sira atu nune’e sira mos bele hadi’a sira-nia moris. Hau bele haree katak hau nia viziñu balun hahu kuda ona ai-farina no agora hakiak mos fahi”.

Ho estimasaun ai-farina kain 10,000 bele kuda iha to’os ho luan hektár ida. Husi ai-farina kain ida, bele koileta fali nia kain tolu to’o haat.