Impaktu jéneru husi pinera, mákina behu batar no mákina fai batar ne’ebé uja iha grupu fini batar

Grupu agrikultór ne’ebé agora kuda fini batar hetan rezultadu di’ak ka batar ne’ebé barak depois de koileta. Tradisionalmente, kona-ba prosesamentu batar no partikularmente hili nia fini/sortasi, baibain hala’o husi feto sira tanba sira konsidera katak serbisu ida ne’e sira bele halo di’ak liu kompara ho mane sira.

Atu hamenus serbisu todan ne’ebé iha, Seeds of Life fornese ona instrumentu ne’ebé bele uja hodi hamenus serbisu hanesan pinera, mákina dulas batar no mákina fai ka harahun batar ba grupu agrikultór sira.

Seeds of Life foin daudaun ne’e halo levantamentu kona-ba impaktu jéneru relasionadu ho instrumentu ne’ebé hamenus serbisu uja husi grupu fini batar sira. Nia objetivu mak atu avalia karik, no oinsa, introdusaun instrumentu hirak ne’e fó impaktu ba iha jéneru, no partikularmente iha divizaun serbisu bazeadu jéneru iha grupu batar nia laran.

Kuaze iha membru mane na’in 50 no feto 24 husi Produtór Fini Komersiál no husi Grupu Habarak Fini Komunidade iha munisípiu ualu mak hetan ona entrevista entre fulan Maiu no Juñu 2015.

Estudu hatudu katak divizaun serbisu bazeadu jéneru kuaze hatudu balansu makaas entre membru feto no mane sira, ne’ebé 50% husi total lalaok serbisu hala’o husi membru feto sira wainhira inklui preparasaun ai-han durante serbisu laran.

Feto sira mos kuaze involve barak liu iha hili batar nia fulin no loke nia kulit (53%), serbisu rua ne’ebé sira sente bele halo di’ak liu kompara ho mane sira.

Screens are the most appreciated tools because they replace manual sorting  © Yessy Betty/Seeds of Life

Instrumentu pinera mak agrikultor sira apresia tebes tamba bele hamenus sira nia serbisu © Yessy Betty/Seeds of Life

Instrumentu hanesan mákina dulas ka behu batar no pinera ajuda hamenus serbisu todan ne’ebé feto sira halo iha grupu nia laran, tanba feto sira la presiza tan atu hili batar nia musan ho liman, tanba baibain serbisu ida ne’e halo baruk no gasta tempu. Agrikultór liu husi 75% haktuir katak sira gasta tempu kuaze uitoan deit ba atividade ne’e wainhira uja instrumentu hirak ne’e.

Jeralmente, respondente feto ho mane kuaze satisfas ho instrumentu ne’ebé simu tanba bele ajuda poupa sira-nia tempu, fasil atu uja no fó rezultadu di’ak. Karik sei iha, maka grupu sira ne’e hakarak atu hetan instrumentu ne’e barak liu tan.

Leave a Reply

You must be logged in to post a comment.