Installasaun Irigasaun Turuk/Drip Irrigation iha Tibar

Iha dia 25 de Novembru staff MAP-SoL hala’o treinamentu kona-ba irigasaun turuk ba Grupu Habarak Fini Komunidade Moris Foun (grupu feto) iha Tibar, distritu Liquiça. Sistema irigasaun turuk foun sei ajuda grupu ne’e hodi kultiva variedade fehuk midar oin tolu ne’ebé fó produsaun aas hanesan (Hohrae 1, 2 ho 3) ne’ebé ofisialmente lansa husi MAP. Variedade oin tolu ne’e nia rezultadu produsaun kuaze 65-130% aas liu variedade lokál. Hohrae 3 mos hanesan fonte Vitamina A. Fehuk midar nia kain kuda ona iha semana ida ne’e atu nune’e nia tempu naton ho tempu udan ne’ebé foin hahu.

drip_irri-14drip_irri-3drip_irri-22

Sistema irigasaun turuk foun sei ajuda grupu ne’e hodi kultiva variedade fehuk midar oin tolu ne’ebé fó produsaun aas hanesan (Hohrae 1, 2 ho 3) ne’ebé ofisialmente lansa husi MAP.

Agrikultór sira iha Timor Leste haktuir katak irigasaun turuk ne’e iha potensialidade atu fornese métodu rega ai-horis ne’ebé efikás no importante liu mak nia kustu menus. Sistema foun ida ne’e iha benefísiu tebes espesialmente durante tempu bailoro ne’ebé hahu husi fulan Máiu – Novembru.

Benefísiu primeiru husi irigasaun turuk mak konsistentemente distribui bee ne’ebé hanesan ba kada ai-horis, ajuda ai-horis atu moris diak no uniforma. Benefísiu segundu mak bele poupa serbisu no tempu. Feto sira iha Tibar baibain gasta tempu óras rua to’o tolu loron ida para rega deit ai-horis ne’ebé sira kuda, nune’e agora tempu ne’ebé sira poupa bele uja fali ba halo buat seluk.

Durante treinamentu nia laran, membru husi grupu ne’e aprende kona-ba oinsa atu installa, uja no mantein irigasaun turuk. Kada membru husi grupu hetan oportunidade atu sobu no monta pipa irigasaun ne’ebé fornese husi MAP-SoL iha total fatin 5. Ho esperiénsia foun ne’ebé sira hetan, grupu ne’e konsege installa/monta rasik irigasaun turuk hitu.

Leave a Reply

You must be logged in to post a comment.