Koko sabór primeiru ba duhaen iha Sentru Peskiza Loes

Staff peskiza MAP-SoL hamutuk ho agrikultór sira realiza koko sabór primeiru ba varidade duhaen ne’ebé iha konteúdu nutrisaun aas iha Sentru Peskiza Loes, Distritu Liquiça, semana kotuk ba.

Varidade duhaen oin neen ne’ebé mai husi Indonézia, Tailándia, Taiwan, Papua New Guinea ho Nigeria, halo komparasaun ho varidade lokál oin rua ne’ebé mai husi Venilale ho distritu Lospalos kona-ba nia testura, sabór no nia midar.

Peskizadór MAP-SoL, Jose da Costa R. Freygen haktuir katak Seeds of Life halo ona peskiza ba varidade duhaen durante tinan tolu nia laran.

The eight varieties of wing bean, both cooked and uncooked, ready for tasting

“Husi varidade duhaen oin 30 ne’ebé haruka mai husi rai liur ne’ebé ami koko, so iha neen deit mak kuaze adapta diak ho kondisaun iha Timor-Leste.

“Agora, ami sei uza rezultadu husi koko sabór primeiru ne’ebé iha hodi identifika varidade ida ne’ebé mak prefere liu husi agrikultór sira para ami bele kontinua halo peskiza ba ida ne’e,” tenik nia.

Mayoria agrikultór ne’ebé partisipa ho staff husi MAP-SoL fó valor diak ba varidade lokál ne’ebé mai husi Lospalos hanesan varidade ne’ebé nia sabór diak liu, tuir fali mak varidade ne’ebé mai husi Indonézia ho PNG.

Tuir Jose Freygen, varidade duhaen lokál rua kuaze atu lakon ona iha Timor-Leste tanba agrikultór sira la kuda durante tinan 10 liu.

“Durante tinan 10 liu ba ita nia agrikultór sira kuda duhaen, maibe agora kuaze atu lakon ona,” tenik nia.

“Ami esforsu aan atu mantein duhaen iha Timor-Leste tanba ai-horis ida ne’e nia konteúdu nutrisaun aas no nia parte hotu-hotu kuaze bele konsumi hotu inklui nia funan, isin, musan ho kulit (polong) no musan mos (biji).”

Atu garante varidade duhaen lokál labele lakon, staff peskiza husi MAP-SoL halo atividade konservasaun balun hodi hadi’a kualidade husi varidade lokál.

MAF-SoL Researcher Jose da Costa R. Freygen said Seeds of Life has been researching wing bean varieties for three years

Objetivu husi konservasaun ne’e mak atu hadi’a siguransa ai-han liu husi hasa’e produtividade legume, espesialmente duhaen.

Koileta duhaen tuir mai ne’ebé kuda iha Sentru Peskiza Loes fulan ida ne’e, Jose sei analiza varidade idaidak nia produsaun hodi hatene kona-ba ida ne’ebé mak nia produsaun aas liu hotu.

Aleinde ne’e, peskizadór MAP-SoL sei distribui fini duhaen ba agrikultór sira para bele halo testu no demonstrasaun iha sira-nia to’os hodi haree oinsa ai-horis ida ne’e nia aprezentasaun ou rezultadu iha to’os ho kondisaun oioin.