Konferénsia TimorAg2016: Seguransa ai-han iha Timor-Leste liu husi Produsaun Alimentár

Agrikultor ho Koordenador Fini Municipiu iha natar laran

Programa Seeds of Life iha Ministériu da Agrikultura e Peskas (MAP), ACIAR no Australian Aid organiza ona konferénsia TimorAg2016 ne’ebé sei realiza iha dia 13-15 de Abril 2016. Konferénsia ida ne’e sei aprezenta esperiénsia ne’ebé MAP ho sira seluk hetan ona liu husi serbisu kolaborasaun ho parseiru dezenvolvimentu oioin atu mellora seguransa ai-han nasionál, seguransa fini no soberania fini iha teritóriu laran tomak. Partisipante na’in 200 husi internasionál no mos lokál husi ajénsia dezenvolvimentu, governu no akademia sira sei partisipa iha konferénsia ida ne’e.

Peritu agrikultura lokál no internasionál ho akademia sira sei aprezenta tópiku kona-ba produsaun agríkula nune’e mos nutrisaun, merkadoria agríkula, estensaun, rai no emprestimu osan, armazenamentu fini, rituais agríkula, komunikasaun no dezenvolve kapasidade ba agrikultura. Aleinde aprezentasaun oral partisipante sira sei aprende kona-ba projetu sira seluk no atividade sira ne’ebé implementa ona iha Timor-Leste atravez expo no mos poster liu husi 50 ne’ebé preparadu husi serbisu agrikultura munisípiu no mos husi parseiru dezenvolvimentu sira.

Iha loron ikus partisipante sira sei iha oportunidade atu hetan esperiénsia kona-ba atividade real iha kampo hanesan iha Aileu, Ermera no Liquiça liu husi vizita grupu agrikultór, sentru peskiza MAP no Sentru Treinamentu CCT. Sei iha oportunidade barak atu hetan koñesementu foun no halo interasaun ho partisipante sira no mos ho oradór konvidadu sira.

Leave a Reply

You must be logged in to post a comment.