MAP-SoL agora dadaun hala’o serbisu iha Distritu 13 nia laran depois de lansamentu ikus iha Distritu Dili

Seeds of Life agora dadaun implementa nia atividade iha distritu 13 iha teritóriu laran tomak depois lansamentu ofisiál nia atividade iha Sub-Distritu Dili iha inísiu de Setembru foin dadaun ne’e.

Lansamentu ne’e marka prezénsia husi Administradór Sub-Distritu, Estensionista sira, Chefe do Suco sira no staff MAP-SoL ne’ebé realiza iha dia 6 de Setembru hodi aprende liu tan kona-ba MAP-SoL ho nia atividade ne’ebé planéia atu implementa iha distritu.

Secretary of State for Forestry and Nature Conservation, João Cardoso Fernandes, during the opening speech

Secretário Estado de Floresta e Konservasaun Natureza, João Cardoso Fernandes, loke lansamentu

Iha nia deskursu abertura, Secretário Estado de Floresta e Konservasaun Natureza, João Cardoso Fernandes, hateten katak governo Timor-Leste serbisu hamutuk ho Seeds of Life hodi responde diak liu tan ba nesesidade fini iha teritóriu laran.

“Obrigado ba kooperasaun ne’ebé halo entre Governo Australia ho Timor-Leste, Seeds of Life bele serbí agrikultór sira ho asesu ba varidade kualidade diak hanesan batar Sele, hare Nakroma no forerai Utamua.”

“Hau enkoraja hotu-hotu atu serbisu makaas atu nune’e ita bele hala’o ita nia serbisu ho didiak, fó garantia ba serbisu iha Suco rurais iha Dili bele hetan susesu no fó ba apóiu agrikultór sira ho fini kualidade diak,” tenik nia.

Atividade MAP-SoL iha Distritu Dili sei inklui estabelesimentu grupu komunidade habarak fini 30 iha total Suco rurais 10 hahu husi Sub-Distritu Atauro ho Metinaro.

Estensionista sira sei fó apóiu ba grupu hirak ne’e ho konselu ne’ebé diak kona-ba prátika kuda, haloot no koileta sira-nia ai-horis.

“Obrigado ba kooperasaun ne’ebé halo entre Governo Australia ho Timor-Leste, Seeds of Life bele serbí agrikultór sira ho asesu ba varidade kualidade diak hanesan batar Sele, hare Nakroma no forerai Utamua”

Lansamentu programa MAP-SoL iha Distritu Dili ne’ebé hanesan Distritu ikus liu han tempu tinan 12 konta husi programa ne’e hahu iha tinan 2000 ho ekipa kikoan ne’ebé foka liu ba testu varidade no identifikasaun ai-horis.

Agrikultór liu husi 33,000 ho sira-nia familia mak agora dadaun uja varidade kualidade diak husi MAP-SoL dezde MAP-SoL primeiru hahu nia atividade iha distritu haat iha fulan Setembru 2005.

Rob Williams, currently SoL's Research Advisor, working with farmers in 2008

Rob William, Advisor Peskiza SoL, serbisu hamutuk ho agrikultór sira iha tinan 2008

Periódu tempu programa MAP-SoL habelar nia atividade iha distritu
2005 – Aileu, Baucau, Liquiça ho Manufahi
2007 – Viqueque, Bobonaro ho Ainaro
2012 – Lautem, Manatuto ho Ermera
2013 – Oecusse, Covalima ho Dili

Antes fin de programa SoL3 iha fulan Jullu 2016, MAP-SoL nia objetivu atu hetan umakain agrikultór 65,000 mak rotinamente produs ai-han uja no bele hetan asesu ba fini husi varidade kualidade diak.

Savi para atu hadi’a asesu ba fini mak Sistema Fini Nasionál, ne’ebé lansa tiha ona iha fulan Juñu tinan ida ne’e. Ida ne’e sei garante familia agrikultór iha Timor Leste atu hetan asesu ne’ebé siguru tinan-tinan ba fini kualidade diak tuir tempu ne’ebé loloos iha tempu kuda.

Leave a Reply

You must be logged in to post a comment.