Ministra Parke enkoraja agrikultór sira atu kuda varidade kualidade diak
Hon. Melissa Parke MP enkoraja agrikultór Timorense sira atu kontinua kuda varidade kualidade diak produsaun aas. Liafuan ne’e hato’o wainhira halo vizita ba grupu feto habarak fini iha distritu Liquiça fulan kotuk ba.
Hanesan parte ida husi nia viajen loron tolu iha Timor-Leste, Ministra Australianu ba asuntu Dezenvolvimentu Internasionál halo vizita ba grupu “Haburas Agrikultura” ne’ebé hetan apóiu husi MAP-SoL iha Suco Ulmera hodi haree diretamente sira-nia rezultadu koileta batar ho forerai.
Nia enkoraja agrikultór sira atu kontinua kuda varidade MAP-SoL para bele produs ai-han barak no diak liu tan ba Timor oan sira.
Chefe de grupu habarak fini hatudu ba Ministra Parke rezultadu fini batar lansa husi MAP-SoL ne’ebe sira kuda
“To’o agora iha agrikultór nain 33,500 mak hetan ona asesu ba fini produsaun aas no ita espera katak iha tinan 2015 agrikultór nain 65,000 mak bele hetan asesu ba fini.”
“Governo Australianu orgullu tebes atu fó apóiu ba programa Seeds of Life ne’ebé serbisu hamutuk ho Governo Timor-Leste hodi hadi’a siguransa ai-han ho nutrisaun iha komunidade rurais nia le’et,” tenik nia.
“Governo Australianu orgullu tebes atu fó apóiu ba programa Seeds of Life ne’ebé serbisu hamutuk ho Governo Timor-Leste hodi hadi’a siguransa ai-han ho nutrisaun iha komunidade rurais nia le’et,”
Chefe grupu, Francisca de Jesus Leite, haktuir katak sira kontente tebes ho rezultadu husi varidade MAP-SoL nian ne’ebé sira kuda.
“Ami kuda fini varidade Sele 3 kg tinan kotuk ba no hetan rezultadu produsaun 380kg.
“Ami kontente tanba Sele nia produsaun aas, no agora ami mos bele fa’an nia fini,” tenik nia.
“Tinan kotuk ba ami rai nia fini ba han deit maibe ami sei kontinua kuda varidade ida ne’e.”
Iha eventu ne’e Vice Ministro da Agricultura e Pescas, Marcos da Cruz haktuir katak Governo Australianu ho Governo Timor Leste serbisu hamutuk atu hasa’e produsaun agrikultura iha rai laran.
“Ita nia produsaun ai-han iha rai laran sei limitadu hela, tanba ne’e dalaruma ita tenke importa fini balun husi nasaun seluk.
“Liu husi serbisu parseria ho programa SoL ita haree ba oin atu hasa’e produsaun fini iha rai laran no hamenus fini ne’ebé ita importa,” tenik nia.
