Timor Leste hanesan nasaun primeiru iha Ázia Pasífiku ne’ebé Lansa Tentativa ONU ba Zero Hamlaha!

Iha dia 9 de Janeiru Prezidente Kay Rala Xanana Gusmão ho Prinseza Maha Chakri Sirindhorn husi Tailándia lansa Tentativa ONU ba Zero Hamlaha iha rejiaun primeiru Ázia Pasífiku (lee istória orijinál iha ne’e).

Saida mak Tentativa ONU ba Zero Hamlaha?

Lansa iha 2012 husi Secretário-Geral Nasaun Unidus Ban Ki-moon, tentativa nia objetivu mak atu estabelese mundu ida ne’ebé ema idaidak iha direitu no iha asesu ba ai-han, ho maneira ne’ebé sufisiente forte atu tahan ba soke/ataka hirak ne’ebé mosu*, inklui mudansa klimátika no degradasaun ambientál.

Bazéia ba Tentativa ONU ba Zero Hamlaha, tentativa signifika katak:

            Zero labarik ne’ebé badak no krekas menus husi tinan 2

            100% iha asesu ba ai-han ne’ebé adekuadu durante tinan tomak nia laran

            Sistema ne’ebé sustentável ba ai-han hotu-hotu

            100% aumentu iha produtividade no rendimentu agrikultór sira-nian

            Zero lakon ou estraga ai-han*

 UN_zero

Elementu fundamental husi Tentativa ONU ba Zero Hamlaha, no eliminasaun eventual husi hamlaha iha Ázia Pasífiku, mak investimentu iha agrikultura, dezenvolvimentu rurais, serbisu ne’ebé adekuadu, protesaun sosiál no igualidade iha oportunidade*.  

Oinsa Ministério da Agricultura e Pescas ho Seeds of Life (MAP-SoL) kontribui ba hamenus hamlaha iha Timor Leste?

seeds-1Alvu husi programa MAP-SoL mak atu hadi’a siguransa ai-han liu husi hasa’e produtividade ai-han prinsipál, ho objetivu atu agrikultór 65,000, ou 50% husi agrikultór Timor-Leste, bele iha asesu no rotinamente uja varidade ai-horis kualidade diak. Liu husi serbisu MAP-SoL, agrikultór Timor oan barak mak haree ona redusaun, ou eliminasaun, husi “tempu rai hamlaha” liu husi koileta ai-han prinsipál ne’ebé fó produsaun aas liu ho maneira ne’ebé sustentável, no uja teknolojia haloot fini/ai-han ne’ebé simples (uja bidon ne’ebé taka metin).

MAP-SoL nia serbisu mak atu hamenus ai-han ne’ebé lakon liu husi promove bidon ne’ebé taka metin hodi haloot fini no ai-han ho siguru hodi elimina tiha lakon husi 20-30% tanba fuhuk no kutun. MAP-SoL mos foin dadaun ne’e serbisu parseria ho Projetu Haloot Batar IFAD Nian ne’ebé distribui bidon hodi haloot fini/ai-han ho kuantidade 80,000 (ho folin $10 deit ba bidon ida) no fornese mos sample fini husi varidade batar kualidade diak hamutuk ho kada bidon.  Aleinde ne’e, fó treinu ona ba Grupu Komunidade Habarak Fini liu husi 1000 hodi produs no haloot ho siguru sira-nia fini rasik husi varidade kualidade diak para bele uja husi membru grupu, no balun fa’an ba familia agrikultór sira seluk iha komunidade nia laran ou distribui ba umakain vulnerável uja sistema billete/voucher ne’ebé suporta husi programa.

Implementasaun estratéjia nutrisaun iha tinan 2013, MAP-SoL nia alvu la’os deit atu garante katak Timor Leste bele han, maibe ai-horis ne’ebé kuda tenke iha valor nutrisaun ne’ebé aas. Ida ne’e inklui dezenvolve varidade fehuk midar ne’ebé fó produsaun aas, no iha nível carotene ne’ebé aas mos (Vitamina A), halo peskiza ba varidade ai-horis kualidade diak ne’ebé iha proteina aas (ex. foremunggu, koto mean) no involve espesialista kona-ba nutrisaun hodi superviziona estratéjia ne’ebé iha. Komponente jéneru MAP-SoL nian alvu mak atu hadi’a status nutrisaun ba feto ho labarik sira iha komunidade agrikultór Timor Leste.

Tentativa ONU ba Zero Hamlaha haree ba programa hirak hanesan MAP-SoL nian hodi ajuda Timor Leste bele besik ou atinji Alvu Dezenvolvimentu Miléniu ONU Nian:

1) Halakon pubreza no hamlaha ne’ebé estremu

3) Promove igualidade jéneru no empoderamentu, no

7) Garante sustentabilidade ambientál*

*Fonte: http://www.un.org/en/zerohunger/challenge.shtml, http://www.un.org/millenniumgoals/

2 Responses to “Timor Leste hanesan nasaun primeiru iha Ázia Pasífiku ne’ebé Lansa Tentativa ONU ba Zero Hamlaha!”

  1. […] Timor Leste hanesan nasaun primeiru iha Ázia Pasífiku ne’ebé Lansa Tentativa ONU ba Zero Hamlah… […]

  2. […] Timor Leste hanesan nasaun primeiru iha Ázia Pasífiku ne’ebé Lansa Tentativa ONU ba Zero Hamlah… […]

Leave a Reply

You must be logged in to post a comment.