Treinamentu pilotu kona-ba planu negósiu susesu ba asosiasaun agrikultór sira

Seeds of Life halo ona treinamentu pilotu kona-ba planu negósiu ho susesu iha fulan ida ne’e ba asosiasaun agrikultór sira ne’ebé fa’an fini komersiál, no agora planéia atu nasionalmente hala’o treinamentu ida ne’e iha tinan 2014.

Sesaun treinamentu halo ba asosiasaun agrikultór tolu ne’ebé estabelese hodi ajuda konstrui sira-nia talentu kona-ba jere atividade grupu, finánsa no komersializasaun fini.

Husi feedback positivu ne’ebé partisipante sira fó, MAP-SoL planéia atu hala’o treinamentu loron ida iha tinan ida ne’e ba asosiasaun agrikultór ne’ebé foin dadaun simu sertifikadu hanesan produtór fini komersiál.

IMG_0691a

Asosiasaun agrikutor Fitun Leste simu treinamentu kona ba planu negosio hodi hasae kapasidade grupu maneja orsamentu grupu.

Laurentino Ximenes, Chief husi asosiasaun Fitun Leste iha Taquinomata, Laga, Baucau, haktuir katak treinamentu ida ne’e iha tebes benefísiu ba grupu sira ne’ebé foin dadaun rejistu hanesan produtór fini komersiál.

“Ami presija hadi’a ami nia kapasidade finansiál para bele jere rendimentu asosiasaun nian ne’ebé hetan husi produs no fa’an fini, nune’e treinamentu ida ne’e importante tebes ba ami.

“Ami mos iha atividade rai no foti osan iha ami nia grupu laran, maibe ami hakarak nafatin atu hadi’a ami nia kapasidade hodi jere ami nia finánsa atu nune’e ami bele hetan rendimentu barak liu tan.”

“Treinamentu ida ne’e ajuda ami hodi kompriende kona-ba oinsa ami bele aumenta atividade negósiu ida ne’e ba iha asosiasaun nia laran hodi suplementa ami nia rendimentu ne’ebé hetan husi fa’an fini,”

Treinamentu loron ida nia objetivu mak atu konstrui kapasidade asosiasaun hodi jere sira-nia finánsa, hanesan rendimentu hira mak sira hetan ona no hira mak sira gasta ona, no atu dezenvolve oportunidade negósiu sira seluk bazéia ba análizi rísku no rekursu asosiasaun nian.

IMG_0701

Chefe asosiasaun agrikultor Fitun Leste konte treinamnetu nee bele ajuda grupu majena sira nia orsamentu

Belinda Ximenes, membru feto ida husi grupu Fitun Leste, haktuir katak treinamentu ne’e importante tebes tanba bele ajuda hadi’a grupu nia talentu no identifika oportunidade negósiu iha seitór sira seluk.

“Ba feto, ami hakarak atu produs no fa’an tais [ropa tradisionál Timor nian] tanba ema barak mak presija ba serimónia kulturál no hanesan prezente. Nia folin mos diak maizumenus husi $60- $100 kada tais.

“Treinamentu ida ne’e ajuda ami hodi kompriende kona-ba oinsa ami bele aumenta atividade negósiu ida ne’e ba iha asosiasaun nia laran hodi suplementa ami nia rendimentu ne’ebé hetan husi fa’an fini,” tenik nia. Diversifikasaun atividade importante tebes para bele halo asosiasaun kontinua susesu tanba merkadu ba fini ne’e tuir tempu deit no fó rendimentu iha tinan balun deit.

Duarte Ximenes, Chefe kona ba Rai no Foti osan ba asosiasaun ne’e haktuir katak, “ami planu atu loke negósiu hanesan hakiak no fa’an animal hanesan manu tanba ami iha rekursu iha ne’e. Agora ami hatene kona-ba oinsa atu aumenta ida ne’e ba iha ami nia atividade fini ne’ebé existe ona.”

Treinamentu pilotu rua seluk halo ona ba asosiasaun agrikultór iha suco Gariuai iha Baucau no suco Fahilebu iha Liquiça.

1 Response » to “Treinamentu pilotu kona-ba planu negósiu susesu ba asosiasaun agrikultór sira”

  1. […] Treinamentu pilotu kona-ba planu negósiu susesu ba asosiasaun agrikultór sira […]

Leave a Reply

You must be logged in to post a comment.