IMG_20131016_123302v2Vizita Prezidente iha Loron Ai-Han Mundiál

Ema saudavél depende ba sistema ai-han ne’ebé saudavél

Ida ne’e hanesan tema Loron Ai-han Mundiál ba tinan ida ne’e (16 de Outubru), ne’ebé Seeds of Life mos hola parte liu husi fahe informasaun no fa’an fini iha eventu ne’ebé realiza iha Sentru Konvensaun Dili.

MAP-SoL koalia ho membru komunidade, estudante husi universidade no ONG sira seluk kona-ba serbisu SoL nian atu hadi’a siguransa ai-han liu husi hasa’e produtividade ai-han prinsipál.

Ministro Sabino koalia hela ho Prezidente no staff MAP-SoL iha stand Seeds of Life nian

Ministro Sabino koalia hela ho Prezidente no staff MAP-SoL iha stand Seeds of Life nian

Vizitante espesiál ba SoL nia stand iha eventu ne’e mak Prezidente Timor Leste Sr. Taur Matan Ruak, ho Ministro da Agricultura e Pescas Sr. Mariano Assanami Sabino, ne’ebé rona esplikasaun husi staff MAP-SoL kona-ba peskiza ne’ebé SoL halo ba hare mean lokál ho koto.

Sira mos aprende kona-ba agrikultór sira ne’ebé serbisu hamutuk ho SoL hodi produs fini komunidade ho kualidade diak, ne’ebé ikus mai sei uja husi familia agrikultór ba produsaun ai-han iha epoka oin mai.

Tuir mai hanesan istória ida husi agrikultór.  

 

Istória husi Sr. Domingos

Domingos Mendonça hanesan chefe husi grupu komunidade habarak fini (GKHF) “Elkolbere” iha suco Sahiri, distritu Aileu.

Grupu ne’e hanesan ida husi grupu komunidade habarak fini ne’ebé simu varidade kualidade diak husi MAP-SoL iha tinan 2011.

Grupu ne’e simu hare fini Nakroma ho kuantidade 25 kg no hetan treinamentu kona-ba prátika diak atu kuda hare.

Domingos Mendonça fahe nia esperiénsia ne’ebé susesu kona-ba kuda varidade MAP-SoL nian

Domingos Mendonça fahe nia esperiénsia ne’ebé susesu kona-ba kuda varidade MAP-SoL nian

“Ita bele haree katak hare fini Nakroma ne’e diak. Depois de kuda no koileta hotu tiha ita hetan nia rezultadu ne’ebé diak.

“Rezultadu ne’ebé hetan iha tinan 2011 kuaze barak liu tinan kotuk ba. Ami kontente tebes ho ida ne’e,” tenik nia.

Iha tinan 2012 grupu ne’e konsege halo koileta hare Nakroma tonelada 2. Ho rendimentu ne’ebé hetan husi fa’an fini, grupu ne’e konsege sosa motor foun ida hodi uja husi membru grupu.

“Hamutuk iha membru nain 20 mak iha grupu ne’e nia laran, no total área ne’ebé kultiva mak hektár 27.

“Atu ajuda organiza ami nia sasan no prepara enkontru ho membru sira maka iha ne’e ami sosa motor ida para bele fó apóiu ba ami nia serbisu.”

Membru husi grupu ne’e haree ba oin atu kuda fila-fali tan Nakroma iha tinan 2013-14.

Ho rendimentu ne’ebé nia hetan husi fa’an fini individu, Sr. Domingos konsege halo nia uma no haruka oan sira ba eskola.

“Osan mai husi fini. Enkuantu ita hakarak serbisu makaas no kontinua aprende atu hariku ita nia esperiénsia, maka ita nia fini sei moris diak no ita bele hetan barak liu tan.”

Leave a Reply

You must be logged in to post a comment.